近排好多地區gp都出現「一句話證明你係當區人」，興致勃勃撳入去，多數都係區內食店，大部分未聽過都經過。
以揸紅的計，一晚就做盡十八區人
大埔八號花園攞車，載客去豪景花園
出返嚟去到有線先有客，西隧去羅便臣道
然後來回中環、羅便臣道，干德道幾次
直到有客去康怡花園，救出村巴循環
進入下一個循環，太古坊來回筲箕灣、小西灣不等，肚餓去太安樓食個飯⋯⋯
去到有一日，不禁問自己，仲有咩地方未去過？數數手指，大約得觀音山係我好想去又未載到乘客去，新界唔少地方都用議員身份去咗，唯獨藍的禁區範圍，入過去玩，無好好咁留意過。
坐上藍的之後，駕駛日記就「枯燥」得多，機場來往東涌各屋苑，入到嶼南只有往梅窩，往大澳兩條路，居民們就係喺沿路唔同地方落車，探下牛，一次半次偶然入芝麻灣，軌跡細好多，簡單純粹。
如果用一句話證明你係香港人，又會係邊句？
每次經過石壁監獄，嗰句說話都會喺胸腔共鳴。
Search